پېښور/اسلام اباد — په بلوچستان کې د جعفر اېکسپریس رېل ګاډي باندې د ترهګرۍ برید او د ژغورنې عملیاتو په ترڅ کې پوځ او بلوڅ بېلتون پاله وسله والې ډلې د درنو ځاني زیانونو د اړولو ادعا کړې ده. د دې پېښې وروسته، وزیراعظم شهباز شریف د ترهګرۍ د مخنیوي لپاره د ټول ګوندیز کانفرنس رابللو اعلان کړی دی. شهباز شریف دا اعلان په داسې حال کې کړی چې تېره شپه تحریک طالبان پاکستان د پاکستاني ځواکونو په ضد د الخندق په نوم د پسرلنۍ جګړې پیلولو خبر ورکړ. ټي ټي پي ویلي چې د دوی جنګیالي او ځانمرګي به د پاکستان امنیتي سرتیري، عسکري تنصیبات او پوستې په نښه کړي.
څېړونکي وایي چې د بلوچستان ستونزه زړې ریښې لري او د دې حل لپاره پوځي عملیات کافي نه دي، بلکې سیاسي قوتونه باید هره پرېکړه عملي کړي. د حکومت د اعلان وروسته، مخالف ګوندونه هم د ترهګرۍ د زیاتېدو په وړاندې د ټول ګوندیز کانفرنس رابللو غوښتنه کړې، خو دوی د حکومت پر ضد تورونه هم لګولي چې د واک ترلاسه کولو لپاره یې په ټګۍ انتخابات ګټلي، خو د ترهګرۍ د مخنیوي توان نه لري.
د دفاع وزیر خواجه آصف ویلي چې حکومت به مخالفو ګوندونو، په ځانګړې توګه پاکستان تحریک انصاف ته، د دې کانفرنس کې د ګډون بلنه ورکړي. خبریال محمود جان بابر وایي چې څو کاله وړاندې هم د ترهګرۍ پر ضد د ورته ټول ګوندیز کانفرنس له لارې 'نیشنل ایکشن پلان' اعلان شوی و، خو پرې عمل نه دی شوی. هغه زیاتوي چې د دې پلان د نه عملي کېدو لامل دا دی چې ځینې سیاسي ګوندونه د دې تګلارې مخالفت کوي. د بلوچستان امنیت یوازې د خبرو له لارې حل کیدای شي، او حکومت باید د بلوڅ ځوانانو غوښتنې ومني.
د پاکستان حکومت د ترهګرۍ پر وړاندې د ټول ګوندیز کانفرنس رابللو اعلان کړی، په داسې حال کې چې راپورونه ښيي چې د ترهګرۍ پېښې په زیاتېدو دي، او امنیتي سرتیري تر ټولو زیات په نښه شوي دي. د پوځ ویاند په یوه خبري کانفرنس کې ویلي چې د تېر کال راهیسې د ترهګرۍ پر ضد جګړه کې ۵۶۳ پوځیان او ۱۲۵۰ ترهګر وژل شوي دي.
