میلاگروس تولون، د اسپانیا وزیر ورزش، ټینګار وکړ چې هیواد یې د ۲۰۳۰ نړیوال جام د پای لوبې میزباني ته وړتیا لري او هیله یې څرګنده کړه چې فیفا به په پای کې دا ویاړ اسپانیا ته ورکړي.
فیفا تر اوسه د ۲۰۳۰ نړیوال جام د پای لوبې د ترسره کولو ځای په اړه خپله وروستۍ پریکړه نه ده اعلان کړې. دا سیالۍ به په ګډه د اسپانیا، پرتګال او مراکش په میزباني ترسره شي، خو لا معلومه نه ده چې کوم هیواد به د پای لوبې کوربه وي.
دا څرګندونې په داسې حال کې کیږي چې ځینې رسنۍ راپور ورکړی و چې جیاني انفانتینو د مراکش د فوټبال فدراسیون د ملاتړ په بدل کې د نړیوال جام پای لوبه په مراکش کې ترسره کولو ته چمتو دی؛ راپور چې فیفا رد کړی دی. تولون د کادناسر راډیو سره په خبرو کې وویل: "مهمه خبره دا ده چې فیفا دغه راپور رد کړی دی. موږ لا هم د فیفا سره په همکارۍ کې یو او زموږ راتلونکی ناسته به په سپتمبر کې ترسره شي. موږ خپلې هڅې ته دوام ورکوو، ځکه چې موږ غواړو او باور لرو چې د نړیوال جام پای لوبه باید په اسپانیا کې ترسره شي. موږ د دې میزباني لپاره وړتیا لرو او له پیل څخه مو په دې برخه کې ژمنه کړې ده."
اسپانیا اوس مهال یوازینی هیواد دی چې د نارینه او ښځینه فوټبال په نړیوالو سیالیو کې د قهرمانۍ تاج لري. د ښځو ملي ټیم په ۲۰۲۳ کې د انګلستان پر وړاندې د بریا سره د نړیوال جام قهرمان شو. د نارینه ټیم هم په ۲۰۲۴ کې د اروپا د قهرمانۍ په سیالیو کې د قهرمانۍ وروسته، تیرې میاشتې آرژانتین ته په پای لوبه کې ماته ورکړه او دویم ستوری یې د خپل ټیم په جرسي کې اضافه کړ.
وزیر ورزش زیاته کړه: "لومړی، موږ په دواړو برخو کې د نړۍ قهرمانان یو. دویم، اسپانیا او پرتګال له پیل څخه په ګډه د ۲۰۳۰ نړیوال جام د میزباني غوښتنلیک وړاندې کړی و، او وروسته مراکش دې پروژې ته اضافه شو. موږ د لویو ورزشي پیښو په میزباني کې پراخه تجربه لرو او سربیره پر دې، اسپانیا د عصري اړیکو شبکې او د امنیت لوړ معیار لري. د دې ټولو ګټو په پام کې نیولو سره، زه ډاډه یم چې فیفا به په پای کې اسپانیا د پای لوبې د میزباني لپاره وټاکي.
د اوسني پلان له مخې، ۲۰۳۰ نړیوال جام د مونته ویدیو، بوینس آیرس او آسونسیون په ښارونو کې د پرانیستې لوبو سره پیل کیږي او وروسته به سیالۍ شبه جزیره ایبري او مراکش ته لاړې شي.
سرچینه: روزنامه اطلاعات روز
