ډاکټر عبدال سید، چې د مصري الاصله مسلمان دی، د امریکا د میشیګان ایالت لپاره د سنا څوکۍ په لومړنیو ټاکنو کې بریا ترلاسه کړه. د رویټرز د راپور له مخې، د دې بریا سره د نومبر په میاشت کې د یوه مهم سیالۍ لپاره لاره هواره شوې ده. دا ټاکنې به وښيي چې آیا یو پرمختګپال نوماند کولی شي په داسې ایالت کې چې سیاسي سیالۍ او ژور وېش لري، بریالی شي.
عبدال سید، چې ۴۱ کلن دی او د مصري کډوالو زوی دی، خپل انتخاباتي کمپاین د روغتیايي خدمتونو، اقتصادي اصلاحاتو او اسرائیل ته د امریکا د بېقید او شرطه پوځي مرستو د پای ته رسولو پر شعارونو متمرکز کړی و. هغه په میشیګان کې لومړنی څرګند پرمختګپال نوماند دی، په داسې حال کې چې په ۲۰۲۴ کال کې دغه ایالت د جمهوريپال نوماند ډونالډ ټرمپ لخوا ګټل شوی و.
عبدال سید به د نومبر په منځمهالو ټاکنو کې د کانګرس له پخواني جمهوريپال غړي مایک راجرز سره سیالي وکړي. د ډیموکرات ګوند، چې د عبدال سید او د هغه د منځلاري سیالې هېلي سټیونز ترمنځ د لومړنیو ټاکنو پر مهال له داخلي اختلافونو سره مخ و، د چهارشنبې په ورځ د ګوند د یووالي پر اړتیا ټینګار وکړ.
د سنا د ډیموکراتانو د اقلیت مشر چک شومر، چې مخکې یې د هېلي سټیونز ملاتړ کړی و، وویل چې ډیموکراتان به د مایک راجرز د ماتولو لپاره سره متحد شي. هېلي سټیونز هم ژمنه وکړه چې د عبدال سید د بریا لپاره به هڅې کوي.
عبدال سید وویل: «هر هغه اختلاف چې د لومړنیو ټاکنو پر مهال زموږ ترمنځ موجود و، د هغو ارزښتونو په پرتله ډېر کوچنی دی چې موږ یې سره یو موټی کوي.» سره له دې چې ډیموکراتانو د ډونالډ ټرمپ تر بیا واک ته رسېدو وروسته په څو ټاکنو کې بریاوې ترلاسه کړې دي، د میشیګان سیالۍ یو ځل بیا د ګوند دننه مهم اختلافونه را برسېره کړي دي.
سرچینه: روزنامه اطلاعات روز پښتو
